In chor baselgia e dus chors mischedai cultiveschan il cant, ferton ch’ina societad da musica, ina gruppa da sunatibas e da corns da catscha e duas musicas da tscheiver sededicheschan alla musica.
Malgrad il turissem ein numerus usits semanteni. Da Daniev van ils affons a 'cattar biemaun', q.v.d. els van da casa tier casa e giavischan in bien niev onn als avdonts. Persuenter retscheivan els in rap. Cuort suenter, da Buania, visetan ils Treis sogns Retgs las casadas.
Era duront il tscheiver ein ils affons activs. Els ein ina part impurtonta dil til da tscheiver. Dil til da tscheiver fan era las musicas da tscheiver indigenas e regiunalas sco era autras gruppas part. L’Uniun da giuventetgna da Sedrun embellescha las fiastas ecclesiasticas cun la parada ed organisescha il Sontgaclau.
Pli baul fagevan differentas uniuns teater. Quella funcziun ha la Cumpignia da teater Rueras surpriu dapi 1980. Ella sepresenta dapi lu bunamein mintga onn cun ina cumedia ni in drama.
L’uniun Forum cultural promova tuttas stentas culturalas dalla vischnaunca sco per exempel lungatg, historia locala, cant e musica, exposiziuns e restauraziuns. Il pli grond project tochen uss ei stau la restauraziun dil Casti da Putnengia.
La Tuatschina ei il fegl ufficial e parochial. Ella cuntegn denton era communicaziuns d’uniuns e reportaschas da diversas occasiuns, gratulaziuns, necrologs, cronicas, contribuziuns biograficas, culturhistoricas e religiusas e rapports da viadi. Quei fegl local, per gronda part en romontsch, cumpara dapi 1972 mintga 15 dis e vegn stampaus dalla Stamparia La Tuatschina. Ella ha varga 1200 abonnents, da quels pli che la mesadad ordeifer vischnaunca.
El Museum La Truaisch han ins endrizzau ina habitaziun d’antruras. En quella anflan ins denter auter in taler, ina roda da filar, divers utensils dalla cultura da glin, dall’economia da latg, dil sport, dil mistregn etc. El plaun sutterran sesanfla in’exposiziun permanenta da cristallas e minerals. Ina gronda attracziun ei la reproducziun d’in fuorn original da Cavradi.