Unviern
Igl unviern ei igl ir cun skis il pli impurtont sport. Las Sedrun Pendicularas porschan el territori da Milez-Alpsu e da Valtgeva 50 km pistas preparadas. Entras la colligiaziun da bigliets cun las Pendicularas d’Ursera tier l’Arena Gotthard Oberalp Dapi 2005/06 ei quella offerta vegnida augmentada sin 130 km. Ina purschida attractiva munta era il parc da neiv (Snowpark) a Valtgeva ch’ei specialmein adattaus per affons.
Sper igl ir cun skis sedattan aunc differentas autras activitads sportivas:
- parc da snowboard a Milez
- via da scursalar Milez – Dieni
- vias da spassegiar
- loipa da cuorsa liunga (12 km)
- glatsch
- curling
- cuorsas da skis
Stad
Era la stad dat ei differentas pusseivladads da far sport: viandar (200 km sendas da viandar signalisadas), ir cun velo, vita parcours, sittar, tennis, gimnastica. Fetg da recumandar per viandar ein las suandontas sendas: la senda da flurs ed jarvas digl Alpsu a Tschamut, la senda ecologica cun tablas d’informaziun digl Alpsu a Cungieri, la via da planets da Sedrun a Mustér e la senda sursilvana digl Alpsu tochen a La Punt.
Da grond'impurtonza turistica ei il plaz da golf a Selva. Era il bogn cuvretg a Sedrun, engrondius dacuort ad ina oasa da wellness, incantescha hosps da vacanzas ed indigens. La purschida turistica vegn cumpletada entras la plazza sport Dulezi a Sedrun che cumpeglia in plaz da ballapei, in plaz dir plurivalent e treis plazzas da tennis. Dasperas eis ei previu da baghegiar ina halla plurivalenta ils proxims onns.