Caplutta da s.Leci Cavorgia

S. Leci a Cavorgia

Ord la historia dalla caplutta

1609	Gl'emprem mussament d'existenza dalla caplutta da s. Leci a Cavorgia ei il zenn pign che porta l'annada 1609. El ha in diameter da 32 cm; tun: g'; peisa: ca. 31 kg e porta l'inscripziun: AVE MARIA GRATIA PLENA DOMINUS TECUM - 1609 Cullader: nunenconuschent Maletgs: dus reliefs rodunds semeglionts a muneida. Il zenn grond ha in diameter da 40 cm; tun f'; peisa: ca. 60 kg e porta negin datum, ei segiramein era buca aschi vegls, cullader nunenconuschent. L'inscripziun secloma: S.LUCI FLORINE ORATE PRO NOBIS Maletgs: s. Giachen e s. Gion evangelist.
1643	La caplutta vegn numnada el cudisch da visitaziun.
1658	ils 8 da settember ei la caplutta vegnida consecrada, probabel suenter ina pli vasta renovaziun, en honur da s. Leci e Carlo Borromeo.
1720	Igl altar ei concepius en ina construcziun ualti gustusa, embellius cun pilasters ed ornaus cun entagls dil temps da rococo. Da mintga vart las statuas da s. Leci e s. Giusep. Quellas ein postadas sin consolas ed encorunadas cun in baldachin, semeglionts ad in parisol. Las statuas sesanflan denton buca directamein sut quels. Quei lai sminar che las sculpturas ein vegnidas tschentadas pli tard sigl altar. Il maletg sigl altar representa la crucifigaziun cun Maria, s. Gion, s. Leci e s. Carli Borromeo. Suren maletg cul s. Bab.
1731	Ils ugaus da s. Leci tenevan fetg bein cassa. Pliras ga han els susteniu generusamein baselgias, parvendas e scolas dalla val. Aschia obtegn la baselgia da Rueras igl onn 1731 ina summa da 250 renschs per gidar a baghegiar. Persuenter haveva il caplon da Rueras l'obligaziun d'ir 12 ga ad onn culla s.messa a s.Leci.
1847	contribuiu al fondo da scola 1300.- francs.
1880	construiu in pierti da lenn avon l'entrada.
1908	Renovau e fatg en in plantschiu cun plattas da cement.
1911	La caplutta survegn in tetg da stuors.
1923	Vid la preit encunter mesanotg sesanflava ina statua da Nossadunna Immaculata. Quella ha sculptur Josef Berther da Rueras, morts ad Augsburg, giu tagliau ora per la baselgia parochiala. Ella ei denton vegnida translocada a Cavorgia. Quella statua ei ussa tschentada el sontget amiez il vitg da Cavorgia. La statua che ornescha ussa la preit encunter mesanotg sesanflava pli baul en sontget e datescha ca. dalla fin dil 16avel tschentaner. Da l'auter maun ves'ins ina statua da Jesus.
1927	a s. Antoni per la nova caplutta a Surrein 1000 francs. per la nova caplutta a Surrein 1000 francs.
1934	Renovau e midau per part la caplutta e construiu in niev pierti. Igl altar ei vegnius restauraus da Stöckli, Stans.
1934	Avon la restauraziun da quei onn sesanflavan aunc dus altars da mintga vart digl arviul. Demai che quels possedevan negina valeta artistica han ins disfatg els. Persuenter decoreschan da mintga vart ils maletgs da s. Emerita e s. Leci.
1960	Finiastras novas.
1967	Colurau l'entira caplutta
1980	Il tetg ei vegnius coluraus da niev.
1982	A Cavorgia vegn la messa legida mintga tschun jamnas. La perdanonza da s.Leci croda sin ils 2 da december. Era quei di ei messa.
1994	Il tetg retscheiva nova colur.
1995	Il tetg sto parzialmein vegnir pinaus.
1996	Erecziun d'ina senda tier la caplutta da s.Leci.


En la caplutta da s. Leci fuva pli baul igl usit da recitar suenter rusari tschun paternos per ils tschun vischins da Cavorgia ch'ein vegni ils 23 da mars en ina lavina sil Vanatsch. Els havevan leu ina meidia fein e pastg. La disgrazia digl onn 1784 haveva tuccau: Statalter Sep Maria Beer, Gion Casperin cun ses dus fegls Gion Flurin e Sep Maria e Gion Antoni de Pelly. Quei bi usit ei semantenius entochen entuorn 1930.

Sontget da Nossadunna dallas dolurs a Cavorgia

Amiez il vitg da Cavorgia stat in sontget. Quel ha ina famiglia Jacomet baghegiau circa alla fin dil 18avel tschentaner. Sco la tradiziun raquenta ord il suandont motiv: Quella famiglia haveva giu dus affons morts senza batten e lu empermess da baghegiar in sontget cun ina statua da Nossadunna dallas dolurs. Silsuenter seigien ils affons buca pli morts ed arrivai tier il s. batten.