Sontget dils Gedius

Il sontget cuntegn quater figuras da lenn en grondezia naturala: Jesus, Maria e dus gedius.
Ellas representan la quarta staziun dalla via dalla crusch.

Ord la historia

1835

Gion Ant. Curschellas da Bugnei e Sep Ant. Caviezel da Sedrun ein serendi quei onn a Nossadunnaun. Sin lur viadi da pelegrinadi han els viu, mond sur il Haggen, in sontget, che representava quella staziun dalla via dalla crusch. Quei sontget ha fatg gronda impressiun sin els, aschia ch'els ein sedecidi da schar far enzatgei semegliont a Tujetsch.

1836

Stai returnai han els tarmess il sculptur Gion Battesta Andreoli da Mustér en quei liug per studegiar las figuras e lu entagliar enzatgei semegliont.
Ils 25 da settember ei Sep Antoni Caviezel morts e G. Antoni Curschellas ha pagau persuls ils cuosts per il sontget e s'obligaus da mantener quel.
Finida la lavur, ein las figuras vegnidas transportadas a Sedrun. Ellas ein vegnidas tschentadas en casa dil plevon. Quella stiva ei persuenter adina vegnida numnada la stiva dils gedius.

1837

Venderdis sogn digl onn 1837 ei vegniu arranschau ina processiun. Las statuas ein vegnidas transportadas naven dalla casa parvenda tiel sontget.
Pli tard ha Tumaisch Curschellas, sutnevs dil sura Curschellas, giu quitau dil sontget.

1923

e cun 1923 han frars Soliva (mulin) da Gonda surpriu il manteniment dil sontget.

1925

Il sontget fuva fetg pigns e consisteva mo ord il chor dad oz.
Perquei eis el vegnius engrondius ed entgins bauns dattan al visitader la pusseivladad da seprofundar en oraziun.
Il tetg da slondas ei vegnius remplazzaus cun stuors. Dapi lu ornescha era in pign clutgeret cun in zenn il sontget.
Avon sur l'entrada in maletg. Jesus suenter la mort vid la crusch.
Oz schai il manteniment da quei ordvart bi sontget els mauns dils sgrs. Pieder Deflorin e Testa Soliva, Sedrun.
Dumengia da palmas vegn, gia dapi onns, la palma benedida avon il sontget dils gedius. Silsuenter processiun alla baselgia parochiala.

1928

Il zennet da 38 cm diameter; tun: b'; peisa: ca. 45 kg cun la scripziun: S.ANNA ROGA PER NUS - 1928. Cullader: H.Rüetschi Aarau.

1999

La Pleiv da Tujetsch surpren il sontget dils Gedius.

2005

Sanaziun dils mirs.