Beinvegni ella biala Val Tujetsch
Tujetsch selegra da scadina viseta! Ils indigens salidan in l’auter cun in cordial „bien di, buna sera“ ni „bien onn“. Quei salid corrispunda a nossa tradiziun romontscha. Malgrad las considerablas midadas dils davos onns, ei il romontsch aunc adina nies lungatg ufficial. Legreivlamein eis ei per gronda part reussiu a nus da mantener noss'identitad e nies idiom tut aparti. Numerusas persunas ed organisaziuns tgiran quellas valurs culturalas cun bia carezia e grond anim.
Tujetsch sesanfla sisum la Surselva. Il Pass digl Alpsu colligia la Val Tujetsch cun la Val d’Ursera. Sin nies territori sesanfla la tgina dil Rein: il Lag da Tuma.
Onns alla liunga ha nies pievel muntagnard viviu dall’agricultura. Ina gronda midada ha la construcziun dils lags da fermada e l’explotaziun dalla forza da l’aua ils onns sissonta purtau. Ils tscheins d’aua han possibilitau d’ameglierar l'infrastructura e d’introducir il turissem d’unviern. Gl’unviern carmala in vast intschess d’ir cun skis ils hosps da lunsch e damaneivel. La stad existan numerusas pusseivladads per excursiuns pli levas e pli grevas. La bellezia cuntrada ei nies scazi.
1995 han ins entschiet cun la construcziun dalla NEAT, dalla nova transversala da viafier dallas Alps. Il plazzal AlpTransit, era numnaus plazzal intermediar Sedrun, vegn visitaus da numerusas persunas mintg'onn. Il davos temps ha surtut il project fascinont Porta Alpina svegliau novas speronzas. Ina colligiaziun directa cun questa colligiaziun internaziunala - entras il pli grond ascensur dil mund el pli liung tunnel da viafier dil mund - fuss pilver in’attracziun singulara. La vischnaunca, la regiun, il pievel grischun e la confederaziun sustegnan quei project visiunari. La realisaziun ei denton aunc buca garantida. La vallada vegn denton a far tut il pusseivel per realisar quella visiun futuristica e segirar in prospereivel avegnir per vischins e vischnaunca.
Pancrazi Berther, president communal