Minerals e cristallas

A geologs e mineralogs ei la Val Tujetsch enconuschenta pervia da sias cristallas e minerals. Els ein d'anflar sigl entir territori, specialmein denton ellas vals lateralas. Il pli renomau liug ei il Cavradi, nua ch’ins anfla ina gronda paletta da cristallas e minerals. Quei ei il sulet liug sigl entir mund, nua ch'ei dat aschi bials hematits (alas fier) cun si rutil. In enconuschent liug ei era la Val Giuv. Da quella val el nord derivan las bialas cristallas neras, ils mulai ch'ein fetg tschercai sco era il renomau milarit. Auters minerals renomai ch'ins anfla en Tujetsch ein ils fens (titanits), anatas, adulars etc. En Tujetsch dat ei ver 100 differents minerals. Las pli grondas cristallas han ins anflau a Nalps, Curnera ed ella Val Giuv.

Tgi che less anflar in fuorn sto saver leger ils segns el grep ed era enconuscher ils buns loghens. Denton era lu vegn il cavacristallas il pli savens anavos cun in sacados vit. Per saver ir a cavar cristallas drova ei ina patenta. Intragliauter venda la vischnaunca annualmein 40 lubientschas e ver 100 quotidianas. Ils cavacristallas ein organisai ella Uniun Cristal Tujetsch.