Tujetsch fuorma la finiziun settentriunala dil Grischun viers ils cantuns Uri e Tessin e cunfinescha encunter damaun cun las vischnauncas da Mustér e Medel. Sia grondezia munta a 134 km2. Quei ei in grond territori, sch’ins cumpareglia Tujetsch p. ex. cul cantun Appenzell (IR) cun ina grondezia da 173 km2. 45% da sia surfatscha ein denton nunproductivs. Sedrun schai sin 1441 m s. m. Il pli ault punct ei il Péz Tgietschen cun 3328 m s. m. ed il pli bass il letg dil Rein sut Nislas cun 1230 m s.m. Tujetsch ei ina dallas pli ault situadas regiuns dalla Surselva. Quei ha consequenzas sin la vegetaziun: Ei dat strusch pumera ed il graun vegn buca dil tut madirs, aschia ch’el stueva vegnir deponius pli baul, tochen ch’el vegneva aunc cultivaus en Tujetsch, per entgin temps sin chischners per saver madirar.
Plirs pass colligian Tujetsch cun autras regiuns: Pass las Cruschs: Sedrun – Amsteg; Pass Bornengo: Pass Alpsu – Lucmagn ni Airolo; Pass Tagliola: Pass Alpsu – Val d'Ursera; Pass da Maighels: Pass Alpsu – Val d'Ursera. Da gronda impurtonza ei il Pass digl Alpsu che colligia Tujetsch cun Ursera entras in stradun ed ina viafier. In access ordvart impurtont vegn era la Porta Alpina a purtar. Quella staziun sutterrana dil tunnel da basa dil Gottard vegn a porscher a nossa vischnaunca ed all’entira regiun ina communicaziun naziunala ed internaziunala.